ОшМУнун Педагогика, искусство жана журналистика институтунда жергиликтүү табигый чийки заттан жаңы дизайндагы кол өнөрчүлүк буюмдарын жасоо боюнча окутуу тренинги өтүлдү.

2025-02-08 05:44:29 45

Тренинг эки күн өтүлгөн. Ага 45 жашка чейинки 30 кол өнөрчү катышышкан. Окутууну дизайнер, Педагогика, искусство жана журналистика институтунун окутуучуусу Зуура Турдубаева өткөргөн. Жыйынтыгында катышуучулар Кыргызстандын салттуу кол өнөрчүлүгүн заманбап дизайн менен айкалыштырууну өздөштүргөн. Аны менен катар эле туристтер үчүн жагымдуу, улуттук колориттеги сапаттуу буюмдарды жасоо мүмкүнчүлүгүнө ээ болушкан. Иш-чара атайын долбоордун алкагында жүргүзүлгөн. Кыргызстан кол өнөрчүлөр кеңешинин Ош шаары боюнча вице-президенти Шарипа Ташкулованын айтымында, долбоорго өлкөнүн жети облусунан жана эки ири шаарынан 400 кол өнөрчүнүн катышуусу күтүлүүдө. Ошондой эле атайын сынактар уюштурулган. Жеңүүчүлөргө Кореядан билим алып келүү мүмкүнчүлүгү түзүлөт. “Бул долбоор жергиликтүү чийки заттарды колдонуп, туристтерге ылайыктуу сапаттуу буюмдарды жасоого багытталган. Быйыл сентябрь айында сегиз кол өнөрчү Кореянын Чонджу шаарында үч айлык окуудан өттү. Эми бул мүмкүнчүлүктөрдү Кыргызстандын бардык аймактарына жеткирүүнү көздөп жатабыз”, – деди Ташкулова. Долбоор Корея менен кызматташтыкта ишке ашырылып жатат. Демилге Кыргызстандын кол өнөрчүлүк тармагын өнүктүрүү менен бирге өлкөнүн туристтик потенциалын арттырууга салым кошууну көздөйт.